મકાનના ભાડાથી લઈને કરિયાણા સુધી, અમેરિકામાં રહેવાનું કેટલું મોંઘું? ભારતીય મહિલાએ જણાવ્યો મહિનાનો આખો હિસાબ
અમેરિકામાં રહેતા લોકો ડોલરમાં કમાણી કરતા હોવાથી તેમની જિંદગી ખૂબ આરામદાયક હશે એવી ધારણા ભારતમાં ઘણા લોકો રાખતા હોય છે. જોકે, અમેરિકાના કેલિફોર્નિયાના બે એરિયામાં રહેતી ભારતીય મહિલા મનીષા ચૌધરીએ સોશિયલ મીડિયા પર શેર કરેલા એક વીડિયોમાં આ ધારણાની હકીકત સામે મૂકી છે.
મનીષાએ પોતાના ઇન્સ્ટાગ્રામ વીડિયોમાં જણાવ્યું કે, કેલિફોર્નિયાના બે એરિયામાં રહેવું અમેરિકાના સૌથી મોંઘા વિસ્તારોમાં ગણાય છે. અહીં એક સામાન્ય પરિવાર માટે ઘરનું માસિક ભાડું 3,500 થી 4,500 ડોલર (અંદાજે 3 લાખથી 3.9 લાખ રૂપિયા) સુધી પહોંચે છે. માત્ર ભાડામાં જ પરિવારની આવકનો મોટો હિસ્સો ખર્ચાઈ જાય છે.
તેણે વધુમાં જણાવ્યું કે, પરિવારના કરિયાણાનો માસિક ખર્ચ 800 થી 1,200 ડોલર (અંદાજે 68 હજારથી 1.03 લાખ રૂપિયા) સુધી પહોંચી શકે છે. જો પરિવારમાં નાનું બાળક હોય તો ડાયપર, દૂધ, સ્નેક્સ, રમકડાં અને અન્ય જરૂરી ચીજવસ્તુઓ માટે વધારાનું બજેટ ફાળવવું પડે છે.
અમેરિકામાં કાર વિના દૈનિક જીવન મુશ્કેલ હોવાનું જણાવતાં મનીષાએ કહ્યું કે, કારની EMI, ઇન્શ્યોરન્સ, પેટ્રોલ અને મેન્ટેનન્સ જેવા ખર્ચાઓ મળીને દર મહિને નોંધપાત્ર રકમ ખર્ચાઈ જાય છે. આ ખર્ચ કારના મોડલ અને ઇન્શ્યોરન્સના દર પર આધાર રાખે છે.
મનીષાના જણાવ્યા મુજબ, બે એરિયામાં સારી આવક ધરાવતા લોકો પણ ખર્ચાના ભારને કારણે માસિક બજેટ બનાવીને જ જીવન જીવતા હોય છે. જોકે, ઊંચા ખર્ચા છતાં કેલિફોર્નિયા અમેરિકાની સૌથી આકર્ષક અને રહેવા માટે પસંદગીની જગ્યાઓમાંની એક ગણાય છે.
વીડિયો સોશિયલ મીડિયા પર વાયરલ થયા બાદ અનેક યુઝર્સે પોતાના અભિપ્રાય વ્યક્ત કર્યા હતા. એક યુઝરે લખ્યું કે, “બે એરિયાનો પગાર ત્યાં સુધી જ મોટો લાગે છે, જ્યાં સુધી ભાડું અને બાળકોના ખર્ચાની હકીકત સામે આવતી નથી.” અન્ય એક યુઝરે કહ્યું કે, “ભારતમાં લોકો ડોલરની કમાણી જુએ છે, પરંતુ ત્યાંનો ખર્ચ પણ ડોલરમાં જ થાય છે.”
ઘણા યુઝર્સે નાણાકીય આયોજનના મહત્વ પર ભાર મૂકતાં જણાવ્યું કે, આવક ગમે તેટલી હોય, યોગ્ય બજેટ અને ફાઇનાન્શિયલ પ્લાનિંગ વિના આરામદાયક જીવન જીવવું મુશ્કેલ બની શકે છે.
મનીષાનો આ વીડિયો માત્ર અમેરિકાના કેલિફોર્નિયામાં રહેવાના ખર્ચાનો અંદાજ જ નથી આપતો, પરંતુ એ પણ સમજાવે છે કે વિદેશમાં ઊંચી કમાણી સાથે ઊંચી જવાબદારીઓ અને ખર્ચાઓ પણ જોડાયેલા હોય છે. તેથી વિદેશ જવાનો નિર્ણય માત્ર સેલેરીને આધારે નહીં, પરંતુ ત્યાંના જીવનધોરણ અને ખર્ચાને ધ્યાનમાં રાખીને લેવો જોઈએ.
