બનાસકાંઠા LCBએ અમીરગઢ વિસ્તારમાંથી એક મોટરસાયકલ પરથી રૂ. 2,63,301/-ની કિંમતનો વિદેશી દારૂનો જથ્થો ઝડપી પાડ્યો છે. આ કાર્યવાહીમાં કુલ રૂ. 3,63,301/-નો મુદ્દામાલ જપ્ત કરવામાં આવ્યો છે, જેમાં દારૂની 13 બોટલો અને મોટરસાયકલનો સમાવેશ થાય છે. LCB ટીમને મળેલી બાતમીના આધારે પોલીસે અમીરગઢના ભાઈલા ગામના બસ સ્ટેશન રોડ પર નાકાબંધી ગોઠવી હતી. નાકાબંધી જોઈને મોટરસાયકલ ચાલકે વાહન ભગાવવાનો પ્રયાસ કર્યો હતો. પોલીસે પીછો કરતાં ચાલક ભાઈલા ગામની સીમમાં રોડની બાજુમાં મોટરસાયકલ ઊભું રાખીને નાસી છૂટ્યો હતો. પોલીસે મોટરસાયકલ પરથી કપડાના થેલામાંથી વગર પાસ-પરમિટનો ભારતીય બનાવટનો વિદેશી દારૂની 13 બોટલો, જેની કિંમત રૂ. 2,63,301/- છે, તે જપ્ત કરી હતી. આ ઉપરાંત, રૂ. 1,00,000/-ની કિંમતનું મોટરસાયકલ પણ જપ્ત કરવામાં આવ્યું હતું. નાસી છૂટેલા આરોપીએ રાજસ્થાન રાજ્ય નિર્મિત વિદેશી દારૂનો જથ્થો ગુજરાતમાં ઘુસાડવાનું ષડયંત્ર રચ્યું હતું. આ મામલે અમીરગઢ પોલીસ સ્ટેશનમાં કાયદેસરની કાર્યવાહી હાથ ધરવામાં આવી છે.
