નવનિયુક્ત મેયરના આગમન સાથે જ પ્રથમ વખત સત્તાવાર પ્રેસ નોટ જાહેર: સોની બજારમાં દિયા ગોલ્ડ પોલિશિંગની મિલકત ટાઉન પ્લાનિંગ શાખા દ્વારા સીલ કરાઈ*
*રાજકોટ, ૩ જૂન:*
રાજકોટ મહાનગરપાલિકા (RMC) માં નવી બોડીની રચના અને નવનિયુક્ત મેયરના પદભાર સંભાળ્યા બાદ તંત્ર તત્કાલ એક્શન મોડમાં આવી ગયું છે. મહાનગરપાલિકાની નવી બોડી દ્વારા પ્રથમ વખત સત્તાવાર રીતે પ્રેસ નોટ જાહેર કરીને કડક કાર્યવાહીના સંકેતો આપવામાં આવ્યા છે. જો કે, શહેરમાં ચર્ચાતી લોકવાયકા અને ગણગણાટ મુજબ, રાજકીય વગ ધરાવતા લોકો અને મોટા બિલ્ડરો દ્વારા કરવામાં આવેલા ગેરકાયદેસર બાંધકામો સામે આંખ આડા કાન કરીને માત્ર નાના અને મધ્યમ વર્ગના લોકોના બાંધકામો સીલ કરવાનો પરંપરાગત સિલસિલો નવી બોડીના શાસનમાં પણ યથાવત શરૂ રહ્યો છે.
*સોની બજારમાં ટાઉન પ્લાનિંગ શાખા ત્રાટકી*
રાજકોટ મહાનગરપાલિકાની ટાઉન પ્લાનિંગ શાખા દ્વારા સેન્ટ્રલ ઝોન કચેરી હેઠળના વિસ્તારમાં એક મોટી કાર્યવાહી હાથ ધરવામાં આવી હતી. ટાઉન પ્લાનર શ્રી એચ.એમ. સોરઠિયાના સીધા માર્ગદર્શન હેઠળ કોર્પોરેશનના સ્ટાફે અન-અધિકૃત બાંધકામો સામે ઝુંબેશના ભાગરૂપે સીલિંગ પ્રક્રિયા હાથ ધરી હતી. જેમાં શહેરના વ્યસ્ત અને હાર્દ સમાન ગણાતા સેન્ટ્રલ ઝોન વિસ્તારના વોર્ડ નંબર ૭માં આવેલી સોનીબજાર મેઈન રોડને અડીને આવેલી દેરાસરવાળી શેરીમાં આ કડક ઓપરેશન પાર પાડવામાં આવ્યું હતું.
*કોમર્શિયલ મિલકત કરાઈ સીલ*
મળતી માહિતી મુજબ, સોનીબજારની દેરાસરવાળી શેરીમાં આવેલી ‘દિયા ગોલ્ડ પોલિશિંગ’ નામની મિલકતના માલિક શ્રી સંજયભાઈ લુવા દ્વારા વાણિજ્ય હેતુ (કોમર્શિયલ ઉપયોગ) માટે ગેરકાયદેસર અને અન-અધિકૃત બાંધકામ ખડકી દેવામાં આવ્યું હતું. આ અંગે ટાઉન પ્લાનિંગ વિભાગને જાણ થતાં, સેન્ટ્રલ ઝોનના ટાઉન પ્લાનિંગ શાખાના સ્ટાફે રૂબરૂ હાજર રહીને આ સમગ્ર મિલકતને સીલ મારી દીધું હતું. તંત્ર દ્વારા સ્પષ્ટતા કરવામાં આવી છે કે આ કામગીરી દરમિયાન મિલકતમાંથી કોઈ પણ પ્રકારનો માલ-સામાન જપ્ત કરવામાં આવ્યો નથી, માત્ર અન-અધિકૃત બાંધકામ વાળી મિલકતને જ કાયદેસર રીતે સીલ કરવામાં આવી છે.
*નાના લોકો જ નિશાન કેમ? જનતામાં સવાલ*
એક તરફ નવી બોડી અને નવનિયુક્ત મેયરના આવતાની સાથે જ લેવાયેલા આ કડક પગલાંને તંત્ર પોતાની મોટી સફળતા તરીકે પ્રોજેક્ટ કરી રહ્યું છે. પરંતુ બીજી તરફ, સામાન્ય જનતા અને નાના વેપારી આલમમાં એવો સૂર ઉઠ્યો છે કે મનપાનું બુલડોઝર કે સીલિંગ માત્ર આવા નાના કતારના વેપારીઓ સુધી જ કેમ સીમિત રહે છે? શહેરમાં અનેક જગ્યાએ રાજકીય આશીર્વાદ ધરાવતા માથાભારે તત્વો અને મોટા બિલ્ડરોએ મસમોટા ગેરકાયદેસર કોમર્શિયલ કોમ્પ્લેક્સ ખડકી દીધા છે, જેમના પર હાથ નાખતા તંત્રના હાથ ધ્રુજે છે. નવી બોડી આગામી દિવસોમાં પક્ષપાત વગર આવા મોટા મગરમચ્છો સામે ક્યારે એક્શન લેશે, તેના પર હવે શહેરભરની મીટ મંડાયેલી છે.
